Årskonferansen 2009
Vi minner om Kulturrådets årskonferanse som vil bli heldt i Arendal 18. og 19. november. Tema er lokalt kulturliv i endring og vi opnar for påmelding i august. (23.06.09)
Nye koplingar mellom kulturliv, offentlege myndigheiter, næringsliv og turist- og opplevingsindustri set dagsorden i norske lokalsamfunn. Etablerte arbeidsmåtar og skilleliner i kulturlivet vert utfordra.
Trua på alt godt kunsten og kulturen kan gjere lokalt og regionalt har kanskje aldri vore sterkare enn i dag. Rådande tankegods fortel oss at kultur og kreativitet gjer stadar attraktive for næringsverksemd og som bustadar, at kunst og kultur kan stå sentralt når regionar og lokalsamfunn skal styrkast og utviklast.
Også kunstnarar utforskar koplinga mellom kunst og stad på nye måtar. Stadsspesifikke kunstprosjekt er med på å skape nye bilete av stader og nye lokale symbol. Nye perspektiv på kunst og lokalsamfunn veks fram.
Norsk kulturråds årskonferanse vil utforske endringar i det lokale kunst- og kulturlivet. Kva for endringar er viktigast? Kva og kven er drivkreftene i det lokale kunst- og kulturlivet? Er kunst og kultur i for høg grad blitt eit instrument for lokal og regional stadsutvikling? Kan dette underminere eigenverdien? Eller har motsetjinga mellom ideen om kunstens autonomi og ideen om kunsten som instrument mista sin relevans? Kva er vilkåra for å arbeide med kunst i norske lokalsamfunn? Kva for erfaringar har kunstnarane? Kva for erfaringar har andre aktørar lokalt, nasjonalt og internasjonalt? Kva for konsekvensar kan og bør svara på slike spørsmål få for den nasjonale kunst- og kulturpolitikken, blant anna for Norsk kulturråds prioriteringar?
Detaljert program for konferansen kjem i august.
Bilde: Union scene i Drammen, en viktig del av byfornyelsen i elevebyen.
Foto: Nina Holtan